സ്പൈനല് മസ്‌കുലര്‍ അട്രോഫി രോഗബാധിതയായിരുന്ന മാട്ടൂല്‍ സെന്‍ട്രലിലെ അഫ്ര അന്തരിച്ചു.തന്റെ സഹോദരന്‍ മുഹമ്മദിനും തന്റെ അതേ രോഗം പിടിപെട്ടപ്പോള്‍ ചികിത്സാസഹായം ആവശ്യപ്പെട്ട് അഫ്ര വീല്‍ചെയറില്‍ ഇരുന്നു നടത്തിയ അഭ്യര്‍ത്ഥന വലിയ വാര്‍ത്തയായിരുന്നു.18 കോടി രൂപയുടെ മരുന്ന് ഇറക്കുമതി ചെയ്യാനാണ് അഫ്ര കുഞ്ഞനിയനുവേണ്ടി സഹായം ചോദിച്ചത്.അഫ്ര സഹായമഭ്യര്‍ഥിച്ചപ്പോള്‍ 46 കോടി രൂപയാണ് അന്ന് സമാഹരിക്കാനായിരുന്നത്.
പേശികളുടെ ശക്തി കുറഞ്ഞു വരുന്ന അപൂര്‍വ രോഗമാണ് സ്പൈനല് മസ്‌കുലാര്‍ അട്രോഫി.കേരളത്തില്‍ ഈ അപൂര്‍വ്വ രോഗം ബാധിച്ച 100 പേര്‍ ചികിത്സയില്‍ ഉണ്ടെന്നാണ് കണക്കുകള്‍ സൂചിപ്പിക്കുന്നത്.കുറച്ച് ദിവസമായി കണ്ണൂരിലെ സ്വകാര്യ ആശുപത്രിയില്‍ ചികിത്സയിലായിരുന്ന അഫ്രയെ കഴിഞ്ഞ ദിവസമാണ് കോഴിക്കോട് സ്വകാര്യ ആശുപത്രിയിലേക്ക് മാറ്റിയത്. ഇന്ന് പുലർച്ചെയായിരുന്നു അന്ത്യം.
